Mi rørslereise starta med at kroppen ikkje lenger ville vere med på det hovudet ville. Eg er utdanna sivilingeniør, og hadde draumejobben som prosjektleiar innan energi og miljø internasjonalt. Eg skapte og gjennomførte prosjekt, og fekk brukt heile meg. Kanskje litt for mykje. Autoimmune plager vert det ofte kalla, det som satte meg tidvis ut av spel og skapte store smerter i kroppen og tåke i hovudet. Første positive vending kom på ein yogaretreat på Kreta. Plutselig var ikkje ledda vonde lenger, og eg innsåg at plagene truleg ikkje berre var arvelig betinga, men også litt sjølvforskyldt. Eg fekk innvilga eit friår fra jobben, og prøvde å leve slik eg levde på yogaretreaten for å sjå om eg kunne få kroppen til å fungere betre meir varig. Eg endte opp med å studere yoga , ayurveda og thai yoga massasje, og snu heilt rundt på heile livet. Eg flytta heim til Sunnmøre, dreiv yogastudio saman med andre, og delte det eg hadde lært som eg syntes funka. Eg hadde lært at eg truleg måtte røre meir på meg enn andre for å halde meg frisk. Så kontorjobb var ikkje lenger eit alternativ.

For å reduserer presset til å tjene nok på yogundervisning gjennom å vere veldig aktiv på SoMe, tok eg meg ein deltidsjobb der ein kan bevege seg gjennom dagen, barnehage. Til mitt hell var dette ein fantastisk Reggio Emilia inspirert barnehage som såg verdi i min interesser for rørsler, og gav meg ansvar for å følge opp barn med spesialbehov. Vi jobba aktivt med planløysingar, materialer, terapiformer og aktivitetar slik disse barna skulle få gode og lærerike dagar, og like muligheter som dei andre til å delta i sosialt samspel. Eit av barna eg jobba med begynte å gjere store hopp i utviklinga etter å ha vore vekkreist på noko foreldra kalla ABM intensiv. Eg vart fascinert, og vart etterkvart med denne familien på eit intensivkurs. Dette kjente eg at eg måtte lære. 

Fra 2019-2022 tok eg grunnutdanninga ABM® NeuroMovement® i USA, og i 2024 påbygging for å kunne jobbe med barn med utfordringar. ABM® NeuroMovement® er ikkje berre eit verktøy som boostar barns utvikling, men også ein læringsmetode vi kan ta i bruk heile livet, uansett alder og utfordring. Det er i dag mitt primære verktøy for å leve eit godt liv. Utover å praktiserer og dele rørsler, elskar eg å røre meg i naturen, bli rørt av andres idear og kunnskap (gjerne på kurs), og ta del i skapande aktivitetar saman med andre. Ved sidan av å drive Rørsleriet jobbar eg som Kjøkkenhagepedagog på Fjelltun Barnehage i Ålesund, studerer Permakultur og plotter med andre prosjekt på si.